(1946-2021)

A at: Pastor Kenneth H. Suanzanang and Professor Pr. Suak Khaw Ngin, MUAS.

Neulai Thu

Pi Lian Za Dim pen 21 Aug 1946ni in Chin State, Tiddim Township, Thuklai khua Pu On Cin le Pi Ciin Kam sungpan piang hi. A it a ngaite in minneu tawh Dimno, ahizongin, a nauzawte in U Dim, Ni Dim, Nu Dim ci uh a, khangmoite in Pipi Dim cih ahihzong in sam ciat uh hi. 

A pa Pu On Cin pen WWI lai in, Piancit pai Sizang le Sukte 946te lakah kihel a, Capt. Rundal kihel   Sizang|Sukte makai-19te lak-ah zong khat ahi hi. Thuklai khua hausa sem a, khua-le-tui makaipa bek hiloh in, ‘Siyin Valley – Sizang kual’ le khuakiim khuavengte theih, mi-zahtaak le mi-minthang khat zong ahi hi. WW2 ciangin Kawlpi – Tedim mawtaw lampi om khin ahihman in Tai-6 le furlong-5 gamla  Thaangmual – Thuklai mawtaw lampi pian nading makaipa ahi hi.

Fort White kihel Sizangkual khua-10te telephone tawh kizopna ding vaihawmpa zong hi a, lupmun ngak a tanu Niangkok in operator sem hi. Kumpi-lai thupi mahmah lohbuang taibaan kul nawnloh zahdong tangpi tangta nuamtuamsak hi.

21 Apr 1955 ni in Thuklai ah nidang apiang ngei nailoh, piangkik ding zong lam-etna om nawnloh tangthu khat piang hi. Tua in General Ne Win Thuklai ah a-vahawhna ahi hi. Chin Rifles Battalion-4 le 15^th Burma Regiment battalion-5 pan ih nei-ngei-sunh Chin Commanding Officers (CO) 5te va kihel thei uh hi. Chin Hills Battalion le galkap pensen-te, kumpi nasemte, sangnaupangte, tangpi-tangta 1000-lomte in Vaidawnna Gateway pan ngak uh a, Ne Win hong tun laitakin pi-300 bang gamla-na pan Pu On Cin in vaidawn hi. Vaimuak mipite kiangah tonpih in, mipi-mai a tun ciangin, Honorary Captain Knaib Commandant Pau Cin (OB, KSM, KPM) in “Word of Command” apiak ciang 3^rd Chin Rifles Band Platoon-te in Band tum in, Gun Salute Mepi-21vei kilawn in zahtaakna kipia hi. Tualak-ah a-kihelte sungpan a liankik pen Honorary Captain Subedar Major Ngin Zam (OB, BGM) le Subedar Thuam Cin (KPM, TDM, IDSM, Jungi I Nam, Mansion) pen Pipi Dim nu Pi Pi Ciin Kam sanggamte ahi uh hi. Subedar Thuam Cin pen 1957kum Sizangkual pan SDA Thuman pom-masate khat zong hi in, Myanmar Union Mission (MYUM) Treasurer Pastor Do Hen Pau pianna pa ahi hi.  Pu Pau Cin pen Pu Thuam Cin sunghpa Pastor Henpui pu ahi hi.

A nu Pi Ciin Kam pen Khuasak Ukpi Pu Lian Vum tanute khat hi a, “Khangkik thei leng, vanleeng-hawl nuam ing” a ci nu ahi hi. Pi Ciin Kam lokhawhna Pu En Suang in ensim a, leivui-khu kamh manloh-zahdong zuan manlangin hat mahmah a muh ciang Pu On Cin zi ding dotzu pia pah hi. Pipi Dim zong a nu suun in zuan manlangin hat mahmah hi. Sangkah ma in tai-2bang gamla Phaipi pan vaimim sengdim, nitak sangtuak ciang tua bangmah suk-le-to a pua den nu hi a, mi tunhzah ka saan loh pen ka vanpuak tamlua ahitam ci hi. Pu Lian Vum sih ciangin a tapa Lian Thawng ukpi suak hi. Vuandok pa kiangah “Mawtaw lam hong bawlsak in,” a cih leh  “Khamtung ah mawtaw pai thei kei” na ci hi. “Piancit zong khamtung gam hinapi mawtaw pai thei ve e!” a cikik pa ahi hi. 

Pipi Dim pen unau laizom-11 lakah a-8na ahi hi: 1) Ciin Ko Hau  (Pastor Mang Cin Pau, RCM), 2) Captain Suang Khaw Lian (Lun Man Cing, Blue Staff), Bawlung siam a, Southern Burma Command Team Captain ahi hi. 1958kum in Northern Command zo in winner hi a, General Ne Win mahmah in Cup piak Team Captain ahi Capt. Lian in sang hi. Galsung-ah a sih lai in Officiating Major hi a, Sivui na ah CO pa in Major Suang Khaw Lian ci in salute pia hi. 3) Nuam Za Cing (Lt. Colonel Khai Mun Mang, chairman of the 3^rd Chin State Pyithu Council), 4) Niang Za Ciang (Khai Nang, headmaster of State Post Primary School le Goalpang-siampa), 5) Colonel Ngo Cin Pau (Niang Za Hau), Badminton Burma Selected hi a, SEA Games (Hongkong) ah kimawl hi. A pensen lak ma in Kimawlna lam ah Advisor zong ahi hi.  6) Sister Vung Za Huai (Reverend Dr. Hau Khaw Pau, former District Commissioner, Tennis siamin kum-60 khit nangawn First Prize ngah lai hi.), 7) Police Captain Ngo Khaw Zam (Lun Man Cing, Blue Staff), 8) Lian Za Dim (Pastor Kenneth H. Suanzanang), 9) Dr. Thawng Cin Pau (Wendy Ciang Za Neam, Managing Director, ChuChu Recycle Myanmar, Dala, Yangon), Bawlung siam a, All University Team ah First Eleven ahi hi. 10) Dim Khaw Huai (Captain Lian Khan Khai, Assistant Director, Myanmar Customs), 11) Uap Khan Dim (Cin Sau) ahi hi.

Sangkahna le Pasal neihna 

Lian Za Dim in KG pan Tan-7 dong SHS Thuklai ah, Tan-8 pen Minglardon SHS (4), Yangon ah, Tan-9 High School Final (HSF) le Tan-10 pen Mandalay Wesley Sang SHS (16) ah kah a, HSF zo in Matric hanciam hi.

A pian in a pate Pu Ngo Thang mintap-in Thang Za Neam ci-in minphuak uh hi. Damthei hetloh ahihman in a nu sanggam Pu Vai Ko Lian (Ukpi Lian Thawng naupa) mintap-in Lian Za Dim ci-in minkheel uh hi. A pasal in tenpih ding mo donghte-2 khah khin hi. A nulepa le a u Niangkok in, “Pu Nang aw, Dimno tawh kingai in, kiten na sawm hang Dimno cidam het loh hi ven,” na ci uh hi. “Ken, Dimno ngai ing. A dam kei leh – ka zi dam loh, a sih leh zong ka zi si” ci giap ahihman in muang uh hi.

5 Jan 1970ni in TOPA sila Kenneth H. Suanzanang tawh Thingunau Biakinn [Siyin Adventist Church (SAC)] ah mi-it le mi-zahtaak siampi Credential Minister Pastor Zakhuma in a siangtho pumkhat-suahna pia hi. Pasian thusiamna tawh tanu-2 le tapa-1 nei hi: 1) Lian Huai (28 Aug 1970), 2] Kam Uap (9 Dec 1971) kum-4 le kha-7 ciang malaria hangin a nuntakna bei hi. 3) Thang Pau (2 July 1973). Lian Huai pen Soe Thura Htwa tawh tanu-2 nei hi: Jennifer DimSaan Htwa (DOB 18 Jun 2003), G-12 at Yangon Adventist Seminary (YAS) le Angela PauSaan Htwa (DOB 28 Feb 2007), G-9 at YAS. A tapa Thang Pau pen a zi Esther Po tawh tapa-1 le tanu-1 nei hi: Samuel Nang Pau (DOB 7 Aug 2002), first-year College at Myanmar Union Adventist Seminary [MUAS], Rhoda Dimdimhuai Pau (DOB 7 Jan 2009), G-6 at YAS. TOPA in Pipi Dim hehpih a, tanu-2, tapa-1, tuupa-1 le tuunu-3 TOPA tel manpha sang hi.    

Nasepna

1969kum in Pupu Ken [Pastor Kenneth H Suanzanang] pen church pastor | evangelist sem dingin Buanman ah kipuak hi. Pawlpi-mi thakte kem dingin Mualbeem ah kikhin a, Buanman ah Sia Pau Za Khan in sem hi. Amau geel kithuah in Thuklai ah thuhilhna effort nei uh hi. Thuklai Effort kiman 9 Aug 1969ni in Lian Za Dim kihel kha manpha 9te Tedim/Tonzang District pastor ahi Pastor Ngul Khaw Pau in tuiphum hi.     

1975-76 kum-in, Lian Za Dim in Upper Myanmar Adventist Seminary (UMAS) ah laihilh siama sem hi. A pasal in UMAS ah kum-12sung [term-2val] sem ahih man in Pipi Dim pen mi tampite a diakdiak in mi cimawh, mi gentheiteNu suak hi. 1969 a kipan Pipi Dim in MV Progressive Class kah in Master Guide a suah dong hanciam hi. 1975kum UMAS ah Maranatha Pathfinder Club kiphuat-khiat ciang Pupu Ken tawh Sabbath sim, sunhun in sangnaupangte tentan pia uh hi. Covid-19 mateng AY kikhop pelhngei-loh nu ahi hi.     

Pipi Dim pen mi tampi in Pastor zite Model (etteh-taak) nu ci-in phat uh hi. Sani Taih Pu Khual Za Nang in Maymyo ah om pastor-zite kiangah, “No siampi-zite aw, na pil vet uh leh, Sia Kenneth zi bang pil un la, na hai vet uh leh Pastor (min-gen-ding kilawmlo) zi bangin hai un,” ci hi,” ci in Pastor Thangpu zi Pi Dim Uap in gen thei zel hi. Min kigenloh nu pen thusia-tawi loh ci-in a phat veve ahi hi. Banghanghiam cih leh, Pipi Dim pen gimloh tawlloh in a omna pawlpi peuh ah nasem hi. 1973lai in Tonzang ah Khuado Pawi bawlpih in bawnggoh uh a, sabawlte zong mankhin nailoh, “Na man peuhpeuh uh ciang anne vaw leh,” ci in bawngsa meh tawh annek ding  abaihsa in na koih ahihciang pawlpi-mite in lamdangsa mahmah uh hi. Amah zindo siamna pen mitampi’n gen cimloh uh hi. Koi Pawlpi ah om taleh, Naupang lam, Numei lam, Innkuan lam pantah in hanciam mahmah ahihman in 2001 kumbei kiteel ciang 2002 pan 2005dong tua panmun-3te len ding UMM Director in kiteel hi. Degree nei loh bek hi a, kilawmpen hi ci ciat uh hi. MYUM Director nu in thudot in neihzaw a, MYUM director-nu pasal in Pipi Dim kiteel pen man penpen hi ci hi. Pipi Dim laibawlte bang Union bup ah kihawm-sawn zaw-lai hi. 

MYUM Siampi-lam director Pastor Stephen Sein hong sih ciang, kiteelna omloh phamawh a, Pupu Ken MYUM ah Communication, Legal Affairs le PARL kici biakna suahtakna Department len dingin a kiteel ciang a pasal nungzui in Yangon ah kikhin ahih man in, ama nasep a nusiat kul hi. Ahihhang khasum kiguanh taleh kiguanh ta kei leh, Pipi Dim hanciam  ahihman in Yangon Central Church ah Innkuan makai director, Deaconess makai cihte kipia tawntungin a sih mateng a khawlloh nu ahi hi. Yangon Zomi Adventist Kipawlna ah a septheih bangbang in sem a, Lawmbung kipan in numeite hanciamna tawh ci-na, misi, zato kahte le midang tampi kihuh hi.  A pasal tawh khut kilen in dinhpih a, a huh thei bangbang in huh hi. A pasal in, “Ka zi in ka kam ah an hong baak lo bek hi. Na khempeuh a baihsa in hong koihsak hi,” ci napi, “Anne manloh liangin laptop mai ah ka tut ciang, hunlap dingin an nangawn hong baak zel hi,” ci in gen thei hi. A pasal zumkah ciang kha a, zumtuak ciang dawn hi. Sia Van Pe Oo in, “Pa aw, ka nu in nisim na silh ding atung anuai kilawm ding teelsa in hong koihsak hiam a cih leh, “Nawtsa in bizu ah na khaihsak a, kei thu in a kilawm ding teel buang ing” ci hi. “Ahihhang puanten tunglam ding nuainung kha leh, na puanten khel lai o,” hong ci hi ci’n gen hi. Sianu Lun Huai in, “U Nang aw, na gualzawhna 50% pen ka Nu Dim hang hi,” ci zel hi. Pupu Ken in, “Tuasang zong tamzaw kha ding hi,” ci hi. Ko unau khawngin Mandalay le Yangon ah ka beel zel uh a, lengla lah tamlua, bangci in anpia pia zo ahih tam ka ci hi. Ka Nu Dim lah khatvei zong maisia ngeiloh, ka unau khawngin ka kikumzel uh a, ii Nu Dim pen U Nang ading mahmah TOPA bawl hinteh, ka ci uh hi,” ci hi.

Pipi Dim pen Sister White gen bangbang a TOPA nungzui nuam a, a kiten kal khat khit ciang nitak biakna ah Kamsangnu laite a simkhop uh leh, saneek hoihlohna na simkha uh hi. Pipi in, “Tua ahihleh sa-tang ding tu’n kipan pah ve ni!” ci hi. A pasal in “Dam dam in e” na ci hi. Tua pen 1970 January ahi hi. Sihzangte in, “Sya Suanzanang hat mama, nasia mama, Sahang takpi lopa ne sak zen” ci sese uh hi. Tua pen man kilkel lo hi. Sahang in Sya Suanzanang lopa ne sak hizaw hi. Amau bawng pen “Sahangte kici hi. Uisan man a, kiko-na hiloh hi. Pu Kip Khai [Pu On Cin pu] kithah sawmin innsungah a kikhumsa taap kan in leng a, suakta hi. Pu Kip Khai in, “Sahang bang kamkei bang ka hi,” a cih pan a-kipan “Sahangte” kici ahi hi. Pipi Dim ii 1974 Kumthak Kiciamna ah sa-tanh ding kihel a, 1 Jan 1974 pan sa-tanh kipan hi. A pasal pen Yangon ah Mizoram ah sangmang sem, Mizote ngaih mahmah Pastor W.G. Lowry le Helen Lowry (Pi Zomangaihi ci’n minpia uh hi) nupate makaih ‘Tentan – Seminar’ pen 28 Aug pan 4 September dong akahna pan satanh ding khensat pan hi.

Pipi Dim in Sabbath ni anhuan loh ding tamveipi hanciam hi. Sister White in, “Friday ni anhuan khol un. Ankhing pen cidamna tawh kituak loh ahihman in satsuah | lumsak un,” ci hi. Rice Cooker, Microweave Oven, Refrigerator cihte nei hileh anhuan tawm kulloh mah ding hi. Tuate genloh hot plate zat ding nangawn a mangmat zokei uh hi. Tuahun 1977-82lai in Mandalay ah mei-tha hoih mahmah ahihhang lei zo phial hileh zong Ne Win ukna nuai hi a, Trade Corporation ah uliante bek lei thei-te ahi hi. Pipi Dim zat pen hot plate tangin sing-at-vui mei bek ahi hi. Ngaisun leng hehpih huai mahmah ta zen hi. UMM Committee pen Mandalay ah kitu zel a, mi-20val neek ding amah bek in huan, amah bek ankuang lui, amah bekbek kipei hi. Tua hinapi Zing-an, Sun-an le nitak-annek hun kisehsa bangin pia lianlian zo hi. Annek hun in Committee aman nai kei lehzong “An kine thei ta,” ci in za sak hi. Tulai committee omleh anhuan ding anpia ding mitampi kiseh hi.  

Pipi thapiak man in a pasal in “Pianciil Thubu pan Lungdamna Aw” le “Exodus pan Lungdamna Aw” kici laibu-2 man khin hi. Exodus pen Joshua dong huam hi. Tu laitak in TOPA JESUS TANGTHU a at laitak ahi hi. A sih ding a gim 6 Sept 2021 ni in Pipi Dim in, “Na lai-at dangte na man leh, ii nasep zom kik ve ni!” a cih leh, a pasal in zong “Awle, zom ning maw” ci in a nupa in sabuai veilam le taklam ah tu-khawm in, Pipi Dim zong nisim a sim ding LST, le 2021 kumbei-ma zawhding Christ Object Lesson (Tedim pau), The Desire of Ages (Kawlpau)te sim hi. LST pen kumsim 1-vei tun hamtang hi.   

A pasal khualzinna Thailand, Malaysia le Singapore ah zui kawikawi a, ahihhang Canada gam, Toronto khuapi ah kibawl 57^th General Conference Session kici Leitungbup GC Khawmpi a kihel thei ding a nupa thungetna ahi hi. Muslim-te Mecca ah khatvei a pai thei ding thupi a sak mah bangin amau nupa in GC Khawmpi pen Misiangthote Kikhopna ci in 1-vei kihelnuam mahmah uh hi. Delegate 1-bek a awng mi-10 ading Pr. Sandy Dee in meesawk a, a nunungpen Pupu Ken nambat-10 asawk masak in sawkkha lian hi. Tua hinapi Kikhopna pan hong ciahloh honkhat om ahih man in Zomi Chin-te hong kigawtin, Pipi Dim US Visa kipia loh sese ahih man in BKK Canada Embassy ulian nu in, Pipi Dimte nupa tawh sabuai ah tukhawm in interview hi. Lungkim takin, “Thursday ni ciang visa hong la un,” ci hi. Azing ciang a paite US Visa neiloh khat kipia loh ahihciang “Kenneth zi zong na pia ve vua” na ci ta zen hi. Ulian-nu in, “Tua ahih leh, nang lah hong pia kei ning, Kenneth zi zong phiatkik ning,” na ci hi. “A pasal vaidinh ciang, Pipi Dim in, “Kei Yangon na zuan ning maw!” ci hi. Pupu Ken in, “Na ciah het kei o! Canada pan hong hanciam ning, ni-1bek nong lapphial zongin hong pai tei tei in. Ih thungetna TOPA in hong za ding hi,” ci hi. Pupu Ken ahih le tentan khat kah masa hi a, Pipi Dim zong GC Khawmpi lapin, TOPA in Canada ah na puak hi.  TOPA ading ahi theiloh a om kei hi. Hallelujah! Leitungbup gam 229pan ‘Thuangsiatna – A Parade of Nations’, ah Myanmar ai-awh in, Pipi Dim [Chin] le Daw Nang Bu [Kachin] in MYANMAR kici ‘placard – lai-dialpi’ tawi uh a, a pasal in Kawlgam landial tawi in mipi 100,000val mai ah a pai theih ciang kipaak le angtang takin TOPA phatloh-in a om thei diam? TOPA minthang ta hen! Amen.       

Nuntakna Nunung Lam

Pensen a pai uh ciangin nidang SDA Zatopi gei ahi Dagon Tsp, 56 Boyarnyunt Road, Thazin Condo ah a mo Nu Lunkhandim le Lian Huaite innkuan tawh teeng uh hi. Thang Paute mission ah inn ngah in teeng uh hi. Friday nitaksim Kikhop man ciang Innpi ah omkhawm in ne khawm dawn khawm in nuamsa mah mah uh hi. Pyinoolwin pan a mo uh dam loh ciang Yangon transfer ding kiphal napi inn kipia lo a, kum-1 sung Innpi ah tengkhawm thei kik uh hi. Naupangte nuamsa mah mah uh a, “Khatvei tu abang innkuan cing omkhawm kik nuam lai ung,” DimSaan le PauSaan in ci uh hi.   

Pipi Dim pen sikhang, lungtang sivui-ciak, zunkhum natnate a neih pen a nungak lai pek pan ahi hi. 2001 kum in ‘mild stroke – layphyan’ hi. Bangkok Adventist Hospital [BAH] kici SDA Zatopi ah 5-vei va pai hi. Tua ahihman in Covid hunsung in lungtang natna suak loh ahihhang kum-1val sung, liangnat, baan-nat, kawng-nat tawh gim mahmah hi. USA ah a natna muntak zasun leng kha-1 kimang kici ahiman in ‘Ar Yu Zatopi’ ah Lian Huaite nupa in 1-vei, Thang Paute nupa in 1-vei paipih a, Operation Room ah zasun liang napi zankhat bek kimang hi. Annek kidawm lua in zatui lah ne ahiman in sikhum kiamlam kiphawk kha-loh hi. Pupu Ken muh pih a kiteh nunung pen 134 ahih man in hoih hi ci in kingaisun hi. 6 Sept 2021 nitak annek laitak in anne thei melloh ahihman in LH in lupna zuatpih hi. A sikhang BP 245/150, a sikhum 70 na himawk hi. Nu aw, bang ut na hiam a cih ciang, “Ka ihmut suak,” ci hi. Sawtloh in khuaphawk loh a, Zoom pan a 2vei-na Thunget 9 Sept 2021 nitak thunget kimlai 9:48 pm in a nuntakna bei hi. Leitungah gim mahmah khin a, “Ka ihmut suak” ci-in a ihmu ahi hi. Tua hong nusiat pen Kum-75 Birthday khit ni 18 ciang hi a, Pupu Ken tawh kiteen khit kum-51, kha-8, ni-4 ciang sihna in khen ta hi. A pasal le a tate in Pipi sih ding patau tawntung a, sroke – layphyan khit kum-10 khengzo kei vak kicih kawm lakpan kum 20 le kha-8 nuntakna hong hehpih-thuah TOPA hoih hi ci uh hi.

Kum-74^th cinh Pipi Birthday lai in Lian Huai in, “Nu aw, kum-85 dong bek maw,” a cih ciang, “Tuahileh, ka tuute mailam mu ding hi veng,” ci hi. Ahihhang a innkuanpihte in muang zolo uh hi. Deihsakna bek hi a, Pipi Dim cidamna kiamsuk mahmah ta hi. Innkuan pih khempeuh in ngai mahmah ahihhang “TOPA’n Pipi ading ahoihpen hong geelsiam-sak hi,” ci in innkuanpihte in kiniamkhiat-takin, TOPA sungah ki-ap uh hi. Mitampi kihtaak paralyses, cancer, covid-19te tawh siloh in, a sih ciang sawt gimlua loh ahih man in TOPA phat uh hi.

Legacy – Ngamh 

Pipi Dim lungsim hoih pen TOPA  piak a pianpih ahi hi. A neu a kipan mibangloh tata anpia puanpia hi. Tua ahihman in tayahaw-syate zi ding teelngam ahi hi. Puanlui khawm in, mi cimawh, mizawngte hawm hi. Gilkialte anvaak ding thanuam hi. Sangnaupangte a inn ah hawhsak in singgah theipuamte ne sak hi. Cinate inn ah samin keem hi. Innvengte misi om a, a kilawh thei natna hinapi cina nu samin a inn ah khoi in kem hi. Lengla-do kin mahmah hi. Mission inn pen 24’x24’ bek zai hi. Khatvei lengla 23 nei ahih man in Sianu Haubongte pawl anbuk ah lum uh hi. Lenglate kipia ahihman in tamvei pi lukham loh tawh lum uh hi. Sungpan piangloh ta tampi in Nu ci uh hi. Tua tate a liat ciang pasian nasem, businessmen suak uh hi. Kimkhatte USA, Australia, Europe gam tungin ‘citizen-gammi’ suak uh hi. A kician mahmah khat pen “PSK Education Fund” tawh a genthei sangnaupangte sangkah sak hi. PSK pen a tapa Pau Suan Khai ahi hi. Sangnaupangte sangkah sak a, honkhat ong khin in gamgi lam, Southern Chin le Kayin State ah nasem suak khin uh hi. Tulaitak in MUAS ah 3 sangkah laitak ahi hi. Israel sungah Nu ahi hi. Upna kibang kiten ding a hansuahna tawh nupa kop-7 sang tawmzaw loh kiteeng uh hi.

A pasal in hibangin teci pang hi: “Dimno le kei pen 1962 dong Thuklai sangkah khawm ka hi uh hi. Amah tan-2 niamzaw hi. 1965ciang ka kimuh kik uh a, ki-itna kipan in ‘datpung – maan’ ka kipia uh hi. Kei pen UMAS kici ding Thingunau ah sangsia ka hi a, amah Yangon le Mandalay ah sangkah hi. 1969 ciang ka kimu kik uh a, “Zi nei ding na sawm na?” hong cih ciang “Dimno bang numei hoih ka muh ciang nei sawm veng e” ka cih leh amah zong lungkim hi. “Dimno aw, kong ngaih mahmah hang kiteng takpi ding hileng hong hehpih ing. Haksa lua ni teh!” No mi nuamsa hi a, kei tayahaw-sya bangmah neih loh khat tawh na ten ding?” ka cih leh, “Ki-itna om peuh leh zawngkhalna, genthei haksatnate ke’n kihta keng,” hong ci hi. 1970kum kipat in ka kiteeng uh a, kum-51val haksatna khempeuh hong phulpih in ka gualzawhna pen ka zi hang ahi hi. Cikmah hun in a phun ngei kei a, hong hehnem zel hi. Hong nusiat ciang mi tampite in hong kahpih uh hi. A hangin 1] “Amah in Israel (Pawlpi) sungah Nu ahi hi (Thukhente 5:7). 2] “Amah nampi gamtat zi hi a, kei kumpi lukhu hong khusak hi” (Paunaakte 12:4). 3] “Zi a mu mi na hoih mu hi a, TOPA  angvanna ngah ahi hi” (Paunakte 18:22). 4] “A thukhual zi ahileh TOPA  kiangpan ahi hi”(Paunaakte 19:14). 5] “A nampi gamtat zi kua in mu zo hiam? Ruby suang sangin manphazaw tham hi. (Paunaakte 31:10).  

Pipi Dim nuntakna a bei laitak in a tanu Lian Huai hibangin taau in kap hi. “Nu, hong ngai lua ing. Nu aw, ka thei ngei nute lakah nang a hoihpen thusiam pen hi teh! Nu aw, nang ading khasia in ka sinna hi! Midang ading na nungta a, nang ading na nungta ngei kei hi. Nu aw, a kiniamkhiat penpen Nu na hi hi. Nang hong it hong ngaite tungah thusiamna na lak bangmah in, na thusiamna nangawn lungdamna tawh hong sanglo, nuimai bek zong na ngah loh mite tungah thusiamna na lakden hi. Nu aw, nang hangin angtang ing. Kuamah na mawhsak ngei kei a, hong kimawhsak leh na khitui luang hi. Kamkhauh, kamkhalh na pau ngei kei hi. Kuamah na tawng ngei kei a, hong kitawng leh na khitui luang hi. Aw sang na zangh ngei kei hi. Sualtungah ahihzong pheek tungah ahihzong nong lumsak ngei kei a, na khuttawh na bawlsa pangpat muaiza tungah nong lumsak hi. Nu aw, a hoih penpen Nu hi teh!”

Pipi Dim pen nampi suan ahi hi. Thaangmual Lamka pan Thuklai lam kibawl lai in makaipa Pu On Cin hangin gim kisa uh hi. “Va-ak a kang zongin Thuklai mawtaw tung ngeikei vak” ci uh hi. Galkap bu pensen khat in a temta dokin tuumding kithawi a, a temta dawnhiam in Pu On Cin  tamveipi dawtkha dekdek zel hi. Pu On Cin in, “Na tu zei” ci ngeingei bek in letmat khat zong a nungkin kei hi. Mi’n, “Lauloh na hia Pu?” a cih leh, “Bo meidawipa ka thei hiloh maw, a meidawi man in temta tawi hiloh maw? Bang kei hong dawt ngam peuhmah dia?” na ci hi. Pipi Dim zong a pa suun in, heh nading mun ah zong kamkhum loh cikmah hun in a zangh ngei kei hi.

Pipi Dim tawh Anunung Hunzatna

Ka thungetna uh pen, “Topa aw, ka nuntakna uh hong la kei in!” cih ahikei hi. “Biakinn pan hunbawl theihdong hong kemlai in,” ahi hi. Himah taleh, hunhoih loh sung sese mah  Pipi Dim in hong nusia citciat a, 10 Sept 2021ni Pipi Dim tawh a nunung hunzatna 10:30am in kipat pen Kigin Ni ahihman in 4:00 pm ciang thugen nuam tampi omlai hitaleh kikhawl a, a khasia tamlai hi. 16 Sept 2021 nitak Memorial Service 7:00pm pan zankim dong kizomsuak hi. Gimlam tawllam phawk manloh liangin, hun-uk, thuhilh, thungen, thugen, hansuah in sumlepai tawh Pipi Dim itna le ngaihna honglak khempeuh TOPA in a zah tampi tawh hong thuk ta hen! Amen.                               

Last Edited on 19 Dec 2021 and Modified on 3 Jan 2022. Last Modified on 31 May 2022.